الأربعاء، 4 نوفمبر 2009

4نوفمبر

 

اولا : كل سنه وانتم طيبين بمناسبة عيد الحب المصري وياريت اي حد مخاصم حد جري يصالحه (يعرض هذا ويعرض هذا وخيركم من بدأ السلام)

وياريت اي اتنين بيحبوا بعض بجد مش لعب يتمسكوا ببعض اكتر وياريت اي ولد بيضحك علي بنت وبيقول لها بحبك وهو مابيحبهاش يتقي الله فيها ويكون راجل ويصارحها ويبعد عنها قبل الامل مايكبر جواها اكتر من كده وتتصدم 

والكلام موجه لكل و البنت برضه بتعمل نفس الكلام وليعلم الظالم منهم ان كما تدين تدان زي ماهتعمل هيتعمل فيك

************

ثانيا : كل قلب انجرح معلش هي الدنيا كده بس الحمد لله ان ربنا كشف لك اللي جرحك كان ممكن تفضل عمرك كله مخدوع لكن ربنا كشف لك الحقيقه ومسيرك تنسي وتحمد ربنا انه نجاك من قلب مخادع

****************

ثالثا : وياريت نحب الوالدين وهمه علي وش الدنيا قبل ماحد فيهم يرحل ونندم علي الرخامه اللي كنا بنعملها معاهم وياريت كل صحاب عنده صاحب جميل ووفي يحافظ عليه علشان ده بقي عمله نادره

*****************

رابعا: وياريت نحب دينا ونتمسك بيه هنلاقي نفسنا بنحب الدنيا والدنيا بتحبنا ياريت نعمل الكلام ده قبل مانجرب مرارة عكسه وكل سنه وانتم طيبين ولبعض محبين وللخير فاعلين

**********************

وان شاء الله هبتدي انشر علي تلات مراحل رأي الاخ اوشو في الحب زى ماعرفنا رأيه في الغضب و علاقة بالحب فى البوست اللى فات … ولا الطيب احسن هههههههه

*تحياتي

هناك 84 تعليقًا:

بنت قلبى يقول...

ايييييييه دا
هوا 4\11
ولا 14\2
وعلى العموم فى الحالتين
ههابى فلانتين داى
بما انها اول زياره بقا

مصطفى ريان يقول...

دنيا
انا اول تعليق والموضوع عن الحب والله ده فال حلو
طبعا كلامك صح لو كل واحد كل صريح مع التانى ومع نفسه فى المقام الاول كان حال الدنيا اتغير
تحياتى لك دايما

مصطفى ريان يقول...

انا اول تعليق مش بنت قلبى
انا جيت هنا قبلهااا

مصطفى ريان يقول...

بنت قلبى
اللي اعرفه انه يوم 14
بس ده هيقى يوم الماتش بتاع الجزائر وماعتقدش انه هيبقى يوم حب خالص
ربك يسترها

Sweet Violet يقول...

عاااااااااااااااااااااااااااااااااااااااااا
مش اخدت اول تعليق
عااااااااااااااااااااااااا

ماشى ماشى
البوست ه اصلا مش محسوب بقى هه بس
v_v

ولا اقولك محسوب بقى لان اليوم عيد الحب يعنى سماح
كل سنه و انتى طيبة
و ياااارب كل ايامك حب و سعادة

^_^

الشعب لابد له من حكومه تشكمه يقول...

حب؟ حب؟
وكما قال مستر ليمبى.
حب اييييييييييييييه اللى انت جاى تقول عليه:))

مش بحب, مش مجروحه, مفيش سبب يخلينى احتفل بيه ههههههههههههه.

اسماء واحلام فى وجدانى يقول...

مش باعترف باليوم ده





خاااااااااااااااااااااااااااااالص

خواطر شابة يقول...

أول مرة اعرف انه هناك عيد الحب المصري
أرجو المزيد من التوضيح من فضلك

mohamed ghalia يقول...

كل سنة وانتى فى حب دايما

romansy يقول...

كل يوم حب وانتى طيبه
يا دنيا مليانه بحب
الحب احسساس جميل
بشرط لو عشناه بصدق هيكون اجمل

مدحت محمد يقول...

الحمد لله انا السنة دى مش بحب حد
السنين كنت عبيط اوى كل عيد حب اغرم

هههههههههههه


كل سنة وانتى طيبة يادنيا

Aиgel يقول...


مساء الخير دنيا

ازيك يا جميل
هابي فلانتين (:

اختيارك للموضوع والحديث فيه اختيار موفق يا دندونة
وحلو اوي البوست السابق معلش مش رديت عليهاوجيت متأخر اصلي بسهر كتير الأيام دي ومش مركزة خالص في المدونة يعني خفيف خفيف

أتمنى لك السعادة يا جميل

بالنسبة لبنت قلبي

فا اسمحيلي ارد عليها (:

4-11 ده عيد الحب الفضي
و 14-2 عيد الحب الذهبي وسموه كده عشان هو تاني يوم عيد ميلادي (:
بهزر طبعا (: بس بجد معرفش ليه سموه كده


دمتِ بحب دنيا

Angel love

Yusuf يقول...

كل سنة وانتي طيبة يا دنيا

ويارب كل اللي نفسك فيه يتحقق

وتكون ايامك كلها حب وسعادة

للأسف مش قادر اكون متواجد بصفة مستمرة بسبب الدراسة

تحياتي

يساري نوبي يقول...

هابي فالانتين دايز
و يارب تبقي كل ايامنا فالانتين عشان الناس كلها تلبس احمر
اولا لاني اهلاوي
ثانيا لاني يساري

اسماء واحلام فى وجدانى يقول...

فينك يا دنيا

مش باينة

donya يقول...

بنت قلبي
********
اهلا وسهلا بيكي في اول زياره
ومناسبه سعيده
لكن ده مش الفلانتين
ده عيد الحي المصري
الحب بكل اشكاله
مش بس الحب بتاع الفلانتين داي

وهو 4 نوفمبر زي مااختاره مصطفي امين

*تحياتي

donya يقول...

مصطفي ريان
***********
اهلا اهلا بيك
الصراحه حلوه في كل العلاقات الانسانيه
وضروريه وهي اللي بتولد الثقه المتبادله
ومن غير صراحه اعتقد لاتستقيم اي علاقه
بالنسبه لأول تعليق حصلت معايا
عند سويت فيوليت علي ماكتبت ونشرت لاقيتني تاني تعليق

معلش يادرش حقك عليا عندي دي
ماقلتليش نكمل في اوشو ولا بلاش

بالنسبه لموضوع الماتش ده انا زعلانه ان توصل علاقه بين بلدين في الماضي وقفوا جنب بعض في صد الاحتلال والنهارده يكرهوا بعض علشان الكوره وكمان سمعت ان اي فندق هينزل فيه مشجعين جزائريين لازم يبلغ علشان الفندق يتأمن بالزمه ده كلام

ربنا يستر

نورتني يادرش

*تحياتي

donya يقول...

Sweet Violet
****************
معلش معلش
ماتعيطيش علشان مااعيطش انا كمان معاكي

هتتعوض المره الجايه
حقك عليا

وكل سنه وانت طيبه

*تحياتي

donya يقول...

الشعب لابد له من حكومه تشكمه
***************************
اهلا بيكي
الحمد لله انك مش مجروحه وان شاء الله ربنا يخليكي تحبي الانسان الوفي الصادق اللي يستهلك

لكن عيد الحب بتاعنا المصري مش بس للي بيحبوا بعض ولد وبنت
ماهواش ده اللي كان يقصده مصطفي امين كان يقصد ان الاسره كلها
لوحد مخاصم حد يجري يصالحه
حاجات كده يعني


*تحياتي

donya يقول...

اسماء واحلام فى وجدانى
**************************
اهلا ومرحبا
ليه مش معترف بيه
مابتحبش اصحابك مامتك باباك اخواتك اصحابك
مش مزعل حد منك وتاخدها فرصه تقول له سماح
مش ناسي حد من اصحابك القدام تعملها حجه وتكلمه وتعرف اخباره

ومتشكره جدا انك لاحظت اني غايبه
فعلا انا مادخلتش النت من بعد مانشرت البوست كنت تعبانه شويه ورحت مشوار رخم كده بس لازم يتعمل

*تحياتي

donya يقول...

خواطر شابة
***********
اهلا بيكي
عيد الحب المصري ده يوم اختاره مصطفي امين يكون للحب بكل انواعه واشكاله
مش بس بين الرجل والمراه
يعني يكون فرصه ان اي اتنين مها كانت العلاقه اللي بتربطهم ازاي يقولوا لبعض بحبك
اي اصدقاء اخوات اب وولاده ام واولادها
كده يعني

وعارفه انا كان ليه واحده صحبتي جوزها وابوها متخاصمين
واتصلحوا في اليوم ده


*تحياتي

donya يقول...

mohamed ghalia
*****************
اهلا وسهلا بيك في اول زياره
وكمان تكون عيد الحب
نورت مدونتي المتواضعه جدا بالنسبه لمدونتك الثريه بالكلام الجميل عن السعاده
ولو ان لي رأي في موضوع السعاده ده مش هيعجبك

وكل سنه وانت طيب

*تحياتي

donya يقول...

romansy
*******
اهلا اهلا بشاعر الرومانسيه في عيد الحب

كلامك جميل لكن فين هو الصدق
واصبح الشاب او البنت
من دواعي امبساطهم ان يضحكوا علي بعض وتكون لهم علاقات متعدده في نفس الوقت

*تحياتي

donya يقول...

مدحت محمد
************
اهلا بيك
ضحكتني علي كلمة السنه دي مش بحب حد دي

طيب نقول الحمد لله
لكن اوعي تكون السنين اللي فاتت كنت ظالم

وياسيدي اغرم وماله مش تسببت في سعادة حد تاني

عمر اللي يحب بصدق مايكون عبيط العبيط اللي جرحه وهو بيحبه بصدق

*تحياتي

donya يقول...

Angel
*******
اهلا بيكي
مساء النور
كل سنه وانت طيبه وقلبك عمران بحب اللي حواليكي

ياتري البوست اللي فات عجبك
وايه رأيك فيه وفي كلام عم اوشو

ملحوظتك جميله
وان شاء الله الدنيا تتظبط معاكي وتنامي كويس

نورتيني

donya يقول...

Yusuf
*********
اهلا بيك
كل سنه وانت طيب
وان شاء الله موفق في الدراسه وناجح بمتياز ان شاء الله

*تحياتي

donya يقول...

يساري نوبي
**********
اهلا بيك
منور احمر

وكل سنه وانت طيب
ومحبوب من كل اللي حواليك
ان شاء الله

*تحياتي

donya يقول...

~PakKaramu~
welcome
it is nice
having you her

اسماء واحلام فى وجدانى يقول...

الف حمدلله على سلامتك من التعب
وكمان من المشوار الرخم


سبب من اسباب اعتراضى على اليوم ده الناس بتحتفل به فى السنة يوم واحد انما فى ناس مش بتحسه به اصلا تعرفى ليه ،، لانها دايما عايشة معاها وانا قلت كده فى كلامى اللى فى البوست ولعلمك ده كلامى حقيقى اوى واسالى اى حد ، مش شرط يكونوا اتنين عشان يبقى اسمه حب

أحــوال الهـوي يقول...

كل سنة و انت طيبه يا دنيا

و لو الدنيا جميلة و حنينة زيك كانوا الناس كلهم عايشيين في سعادة لانك ما نستيش حد في موضوعك اللي ىحب و اللي غدر و اللي انجرح و اللي خان
حب الاهل و الدين

تحياتي

مواطن مصري يقول...

رابعا: وياريت نحب دينا ونتمسك بيه هنلاقي نفسنا بنحب الدنيا والدنيا بتحبنا ياريت نعمل الكلام ده قبل مانجرب مرارة عكسه وكل سنه وانتم طيبين ولبعض محبين وللخير فاعلين



دي صعبة انا حاسس بأن الدنيا مخصماني

مواطن مصري يقول...

و طبعا مر الفلانتين عليا و انا سنجل


:D

حلم بيعافر يقول...

كل سنة وانت طيبة
الحب اصل الحياة
اتمسى بالخير

ريمان يقول...

البوست بتاعك جميل اوى بصرف النظر عن الاحتفال بعيد الحب


وجميله اوى الوصايا بتاعتك


تحياتى ليكى

بجد سعيده بمروروى فى مدونتك

مصطفى ريان يقول...

اختى العزيزه دنيا
يارب تكونى بخير وفى احسن صحه وحال ويارب الكتاب والبرنامج يعجبكوكى
بصى بالنسبه لاماكن بيع الكتاب
لوكنت من سكان القاهره ممكن من وسط البلد من مكتبه عمر بوك استورز فى شارع طلعت حرب اعلى مطعم فلفله
اومن مكتبه البلد بجوار هارديز امام الجامعه الامريكيه
اومن فروع مكتبه ديوان فى الزمالك ومصر الجديده وجامعه القاهره
- ومكتبه نون ش السد العالى ميدان فينى الدقى
- مكتبه ليلى 17ش جواد حسنى من شارع القصر العينى
وممكن كمان تدخلى على جروب دار اكتب على الفيس بوك هتلاقى كل اماكن التوزيع فى بقيه المحافظات

http://www.facebook.com/inbox/?ref=mb#/group.php?gid=5057370325&ref=ts
تحياتى لك ودمت بكل الخير وان شاء الله هنتظر رأيك عن الكتاب

Cute Kitty **sookra يقول...

اتاخرت عليكى يادنيا
الزعل مرفوع
المهم كل سنه وانتى طيبه وموش لازم يكون يوم للحب عشان نفتكر ان احلى حاجه فى الدنيا ان حبايبنا يكونوا جنبنا
تحياتى

micheal يقول...

يا ستي كل عيد حب وانتني طيبة وفي أسعد حال
نروح نشوف حوار الأخ أوشو ده
:)
تحياتي

Unknown يقول...

كل عام والجميع يحيا يالحب من اجل الحب

مش مخاصم حد ولا انجرحت يبقى عليا ان اتمسك بدينى حاضر

Unknown يقول...

تدوينة رقـــيقة
وجميلة زيك بالضبط
كـل لحظة وأنتِ بخـــير

وردشان smilyrose يقول...

السلام عليكم

اتأخرت عليكى يا دنيا

بس والله البرد وسنينه

كلامك جميل جدا يا بنوتة وياريت فعلا

كل واح وواحدة يعملوا بيه

وياريت فعلا كل انسان بيحاول

انه يجرح انسان او يخدعه يتقى الله

ويحط نفسه مكانه ويشوف هيقدر يتحمل الالم ولا لأ

دى البداية

اختك وردشان

Tamer Nabil Moussa يقول...

كلامك جميل

ونصائح غالية

جزاك الله خيرا


مع خالص تحياتى

غير معرف يقول...

ربنا يجعل كل أيامنا اعياد حب

زهور الامل يقول...

كل عام وانتي في قمة الحب والجمال

وكل عام والناس كلها بتحب بعض وبيوفوا لبعض

تحياتي

غير معرف يقول...

كل سنه وانت طيبه .... معلش جت متاخره بس كنت مشغوله

تحياتي

طهقان يقول...

مبرووووك افتتاح المدونة

donya يقول...

اسماء واحلام فى وجدانى
*************************
ازيك
والله يسلمك

عندك حق في ناس عايشه اليوم ده علي طول بتحب الناس كلها وبتبر والديها وجيرانها وماتحبش تزعل حد منها بتصالحه علي طول
لكن كمان في ناس كده لازم تصحصحهم ولو يوم في السنه
زي اللي مسافر ومابيودش امه لما يلاقي عيد الام جه يجري يكلم امه ويفتكرها
هو كده في ناس عايزه اللي يفضل فوق راسها يفوقها
ولله المثل الاعلي

ربنا جعل لنا حاجات تشحنا برضه وتفكرنا بالعباده
زي يوم الجمعه اللي مابيرحش الجامع طول الاسبوع بنفكره بالجامع يروحه يوم الجمعه يمكن ربنا يهديه ويفتكر يروح كل صلي مش يوم الجمعه بس
ورمضان بيشحن للسنه كلها
يمكن لما نفكره بصلاة الليل يستمر بعد رمضان ولما نفكره انه لازم يقرا قران يستمر بعد رمضان وهكذا
لازم يكون في تذكير لكل حاجه وفي كل حاجه حتي العباده برضي بنذكر بيها
ذكر فان الذكري تنفع المؤمنين

*تحياتي

donya يقول...

أحــوال الهـوي
****************
اهلا بيك
كل سنه وانت طيب

شكرا ليك

تعليقك اسعدني

نورتني

*تحياتي

donya يقول...

مواطن مصري
************
اهلا اهلا بيك

انت اخترت احلي حته انا كتبتها في البوست فعلا

الدنيا مابتخاصمش غير اللي يخاصمها
صدقني عن تجربه
صالح الدنيا هتصالحك
وياريت تصالحها بمزاجك وانت في كامل وعيك
بدل ما تصالحها تحت تأثير ادوية الاكتئاب
وده بيكون صعب

ان شاء الله الفلانتين الجاي ماتكونش سينجا
لكن تكون تستهلك
:)

*تحياتي

donya يقول...

حلم بيعافر
***********
اهلا بيك
وكل سنه وانت طيب

الحب هو كل الحياه لكن الصادق فقط

ويسعد مساك يافندم

*تحياتي

donya يقول...

ريمان
*******
اهلا وسهلا بيكي
نورتيني

وليه بغض النظر عن الاحتفال
عارفه لو في حد لابد له ان يكفر بالحب هيكون انا
لكن الحقيقه ان الحب موجود مش لازم يكون بين ولد وبنت في حاجات كتير الحب فيها موجود ويستحق ان نحتفل بيه

سعيده لزيارتك
وارجوا ان تتكرر


*تحياتي

donya يقول...

مصطفي ريان
***********
اهلا بيك ان شاء الله هشتري الكتاب في اقرب فرصه
اما البرنامج اكيد طبعاكان لطيف جدا

يارب دايما كده منور الشاشه

تحياتي

donya يقول...

Saso
*******
اهلا اهلا بيكي
نورتي والمهم انك جيتي
والزعل دايما مرفوع

وياريت تقري ردي علي اسماء واحلام في خيالي

*تحياتي

donya يقول...

micheal
********
اهلا اهلا سيادة العميد عندنا يامرحبا يامرحبا
وانا اقول وانا داخله المدونه ارد علي المدونين لاقيت في تشريفه وعساكر
قلت خير
هههههههههه

كل سنه وانت طيب
وان شاء الله عيد الحب الجاي تكون بتشتغل موظف كبير قد الدنيا
تعرف انا لو من الناس دي اشغل علي طول ده انت يابني خبره في الوظائف

يارب اوشو يعجبك ده راجل زي الفل

*تحياتي

donya يقول...

العيسوي الصغير
***************
كل سنه وانت طيب ومحبوب من الجميع

والحمد لله انك لامجروح والا جارح والا بتحب

يبقي انت تمسك برابعا

نورتني


*تحياتي

donya يقول...

norahaty
***********
كل سنه وانت طيبه
ومنوراني
انا كتبت لحضرتك البوست اللي فات لينك بيت السلام


تحياتي

donya يقول...

smilyrose
*************
اهلا وسهلا ومرحبا
بشاعرتنا الرقيقه
مدونتك جميله جدا واشعارك جميله اوي

وبجد سعيده بزيارتك جدا

نورتيني

*تحياتي

donya يقول...

Tamer Nabil
****************
اهلا وسهلا
كل سنه وانت طيب
شكرا علي كلامك
نورتني


*تحياتي

donya يقول...

Sonnet
*******
اهلا وسهلا
المدونه نورت

تحياتي

donya يقول...

زهور الامل
***********
اهلا اهلا
كل سنه وانتي طيبه

ربنا يستجيب لدعائك وفعلا الناس توفي لبعض فعلا

نورتيني

*تحياتي

donya يقول...

فتاه من الصعيد
***************
اهلا وسهلا بيكي
كل سنه وانتي طيبه ودايما سعيده
ويعينك علي انشغالك ويبعد عنك كل شر

تحياتي

donya يقول...

طهقان
******
اهلا وسهلا
المدونه نورت
والله يبارك فيك


*تحياتي

اسماء واحلام فى وجدانى يقول...

بالنسبة للكوسة فــ دى ليها كلام تانى


اولا انا معترف بكل كلمة انتى قولتيها
بس القلب مش محتاج يوم عشان يفتكر فيه اللى بيحبه القلب اللى بيحب بيفضل فاكر دايما حبيابه فما بالك بالام ولا الحبيبة اظن مش محتاج يوم القلب ده هتلاقيه كل يوم فى عيد
كلامك مقنع بس مش مرضى لبعض الناس اللى انا واحد منهم زى العبادة الواحد مش محتاج رمضان عشان يقرب من ربنا لآلآ رمضان رحمة من ربنا عشان يخفف عنا اكتر لكن طول السنة مطلوب نقرب ونعمل كل خير

وفى فكرة بوست بخصوص الموضوع ده عايز اعملها بس محتاج شوية افكار عايز اجمعها بخصوص عيد بردوا بس مش عيد الحب عيد تانى

donya يقول...

اسماء واحلام فى وجدانى
**********************

ههههههههههه
انت علي طول كده معترض
مابتعرفش تقول حاضر وتمشي الدنيا
هههههههههههه

ماشي ياسيدي كلمتي اللي مابتنزلش الارض ابداااااا
هتنزل المره دي
لكن المره الجايه لايمكن ابدااااا
هههههههههه


لكن مالها الكوسه
ده انت المدونه عندك من كتر الكوسه المزروعه فيها اخضرت

ماعلينااااااا
ههههههه


تخيااااااتي

اسماء واحلام فى وجدانى يقول...

الموضوع مش موضوع اعتراض لا ابدا دى بس مجرد وجهة نظر مش اكتر لك كل الحق انك تقبليها او ترفضيها هى مش اكر مسلم به، لكن انا بافكر فى ابعد من كده شوية وبردوا يمكن التفكير ده يكون صح او غلط مين اللى عمل يوم عيد الحب ده مصطفى امين هو اللى ابتكر عيد الام وعيد الحب وعيد الاب كمان على فكرة قبل ما ابدا كلامى انا الحمد لله والدتى موجودة بخير الحمد لله ، بس فى حاجة فى الاعياد دى يوم عيد الام كل واحد بيكون فرحان بامه اوى وكل ام فرحانة بولادها انا يا دنيا اعرف ناس شخصيا والدتها متوفية بتختفى الاسبوع ده خالص فى البيت مش بتظهر نهائى من الوجع اللى بيحسوا به وكمان للاسف كنت صادفت ام فى يوم عيد الام من سنين طويلة اوى وللاسف كانت مش بتخلف قالتلى كلمة وجعتنى اوى ولحد دلوقتى مش قادر انساها وتخيلى فرحتها لامة قلت لها كل سنة وانتى طيبة ،، عارف انى ممكن اكون بعدت خالص عن موضوعنا بس الاساس واحد ،، سالت انسانة قريبة منى قالتلى بلاش عقد وعيش حياتك كان الكلام عن عيد الام تصدقى لحد النهاردة لو حسيت ان هاشوفها بابعد عنها نهائى
، لان لو فى قلبها ذرة حب صادقة مش كانت قالت كلمة زى دى ،، تفتكرى اللى عمل عيد الام لو كان حس بكل ده كان عمله ،، هو اكيد كان نفسه يكرم امهات تستحق التكريم بس احنا للاسف غيرنا مضمون العيد الحقيقى وخليناه عيد براحتنا احنا ،، انا كان نفسى اعمل بوست للموضوع ده لان مارس اللى فات كتير نشره بوست لعيد الام وبصراحة كنت زعلان اوى للموضوع ده ومش قدرت اتكلم ولحد دلوقتى خايف اعمل كده حد يفتكر حاله ويزعل واكون انا السبب
عارف انى دوشتك بس انتى السبب فى كل ده


هدنة ولو ما رجعت تانى هتلاقينى اسالى عنى اى قطة معدية

donya يقول...

اسماء واحلام فى وجدانى
**************************
مساء الخير
اهلا بيك اعترض زي ماانت عايز انا بضحك معاك بالعكس الحوار معك جميل جدا
وبعدين موضوع عيد الام ده موضوع طويل جدا
وعميق للغايه

وزي ماقلت لك احنا في زمن في ناس عايزه اللي ماشي وراها يفكرها دايما

ومش معني ان واحده مابتخلفش نحرم جارتها اللي بتخلف انها تحتفل بعيلها اللي نجح مثلا
اصلا هي بتاخد اجر مابتخدوش جارتها المخلفه

والا اعتقد كده احنا بنعترض علي حكمة ربنا

همه 24 موزعين بالعدل

منورني دايما

تحياتي

اسماء واحلام فى وجدانى يقول...

طيب بما انك بتقولى الموضوع عميق

يبقى تقريبا فى سوء تفاهم او معلومة منى وصلتك غلط ،، مقصود كلامى مش على اتنين جيران ولا حتى شارع باكمله انا باتكلم عن بلد كاملة اذاعة وتليفزيون اى جهة بتحتفل باليوم ده من اول الحضانة لحد الجامعة للمرة التانية اوعى تقولى فى سرك الواد عنده عقدة ،، وبعدين مين قال ان فى حد ممكن يعترض على امر ربنا المؤمن بيرضى بنصيبه مهما كان فى اماكن فى مصر معندهاش فكرة عن كل الاعياد دى بشكل كامل ميعرفوش غير الاعياد الرسمية والدينية بس ، ولعلمك الكلام فى الموضوع ده مش هيخلص لانه اكبر مننا بكتير ومالهوش نهاية وكمان مالهوش حل

اسماء واحلام فى وجدانى يقول...

نسيت اقولك تقصدى ايه بالرقم 24

رامز عباس يقول...

زيارة أولية من مجرد رؤية تعليقك عند باسم اليساري النوبي الاحمر

miroooo يقول...

كل عيد حب وانتى بالف خير يارب انا عارفه انها جت متاخره بس معلش الدراسه وخدانى دعواتك دمتى بالف خير

ليس فقيرا من يحب يقول...

السلام عليكم

اول زيارة ليا لمدونتك وباذن الله مش

الاخيرة لانى خلاث حطيتك فى الريدر

كل يوم حب وانت سعيده ومبسوطه

تحياتى

خوخه يقول...

هابي فلانتين داي متأخره بس معلش

صوت من مصر يقول...

خامسا كل سنه وانتى طيبه وبخير

مواطن مصري يقول...

انا جي ارمي السلام عاملة اية

اسماء واحلام فى وجدانى يقول...

ازيك يا دنيا

غايبة يعنى ومش عادتك تغيبى كده
يارب نسمعك عنك كل خير يارب

البنفسج الحزين يقول...

كل سنه وانتي قلبك عامر بالحب
وكلامك بجد جميل ويا ريت محدش ينطق بكلمه بحبك الا لو فعلا حاسسها بجد ...
دمتي بخير

donya يقول...

اسماء واحلام في وجداني
**********************
اسفه علي التأخر في الرد
كنت اولا عيانه جدا ثانيا ماكنش عندي نت

اقصد ب 24 قيراط
الدنيا 24 قيراط بتاخدهم مشكلين
كده

وشكرا جدا جدا
انك حسيت بغيابي وسألت عليا

*تحياتي

donya يقول...

رامز عباس
**********
اهلا وسهلا بيك
نورت المدونه
وان شاء الله دايما تزرورها

*تحياتي

donya يقول...

miroooo
********
اهلا اهلا
كل سنه وكلنا في حب وسعاده حقيقيه

وان شاء الله خير والدراسه تكون تمام
المدونه نورت

*تحياتي

donya يقول...

ليس فقيرا من يحب
*******************
اهلا وسهلا في اول زياره
وكل سنه وانت طيبه
وان شاء الله مستنياكي علي طول

*تحياتي

donya يقول...

خوخه
*****
اهلا
كل سنه وكلنا في حب وسعاده

المدونه نورت

*تحياتي

donya يقول...

صوت من مصر
************
سادسا
وانت طيب وسعيد

نورتني

*تحياتي

donya يقول...

مواطن مصري
**************
اهلا اهلا
ازيك انت
الله يسلمك
انت اللي فين
شكرا علي سؤالك وسلامك

*تحياتي

donya يقول...

البنفسج الحزين
*****************
اهلا وسهلا بيكي
فعلا ياريت مايتخذش الحب لعبه يضحك ويخدع بيها طرف علي الطرف الاخر
ياريت

نورتيني

*تحياتي

donya يقول...

دموع كابر
************
اهلا وسهلا بيكي
ان شاء الله اروح ازور مدونتك وكلنا جداد في المنطقه

نورتيني
*تحياتي